Синоќа на граница е приведен Владимир Тодоровиќ, сопственик на ланецот маркети „Тинекс“ и поранешен градоначалник на Општина Центар. Во полициска акција, приведен и поранешниот претседател на Советот на Општина Центар Владимир Здравев.

Од МВР за Слободен печат велат дека вчера (29.06.2023) во попладневните часови и во текот на вечерта од страна на полициски службеници од МВР – Оддел за сузбивање на организиран и сериозен криминал, по налог на ОЈО ГОКК, а со наредба на судија на претходна постапка, лишени се од слобода пет лица во врска со чл.273 ст.5 и чл.353 ст.5 од Кривичниот законик.

Лицата се приведени и задржани во полициска станица и во текот на денот ќе бидат изведени пред судија на претходна постапка. Неофицијално, дел од лицата се уапсени на  граничниот премин Табановце, дел на Скопски аеродром.

Според нашите извори, приведувањето е за набавка на опрема на мостот Око. Тоа е проект од времето на ВМРО-ДПМНЕ, „Скопје 2014“.

Во попладневните часови прес конференција најави и Јавното обвинителство токму за овој случај.