На туристите во популарниот португалски град Албуфеира наскоро би можело да им биде забрането да се шетаат во костим за капење, бидејќи во спротивно ќе се соочат со високи парични казни.

Крајбрежен град во јужниот регион Алгарве, омилена дестинација за британските туристи, го промени својот кодекс на однесување, експлицитно забранувајќи им на луѓето делумна или целосна голотија на јавни места. Според новите планови, секој што носи костим за капење или шета без маица подалеку од плажата може да биде казнет до 1.500 евра.

Албуфеира се приклучува на релативно долгата листа на европски градови со слични закони, вклучувајќи ги Барселона, Дубровник и Ница, пишува Би-би-си.

Имено, одлуката за забрана за шетање во костими за капење и без облека дубровчани ја донесоа пред осум години, кога беше овозможено да казнуваат туристите кои се несоодветно, непристојно облечени на јавни површини во историското јадро на Дубровник.

Минатата година осум Британци беа снимени како танцуваат целосно голи во бар среде бел ден на Руа да Уара, главната улица за забава во Албуфеира. Видеата станаа вирални, а португалската полиција успеа да ги идентификува туристите.

Инцидентот доведе до итен состанок на надлежните органи, а градоначалникот Хозе Карлос Роло вети дека ќе се справи со разузданото однесување на туристите.