Спортска Македонија тагува после трагичната смрт на голманот на ракометниот клуб Охрид, Никола Даниловски.

Веднаш се огласи и неговата матична екипа со пораки на тага и жалење за изгубениот млад живот, воедно испрати и сочувството до семејството на ракометарот.

– Затечени и потресени сме од трагичната вест за прераната смрт на нашиот голман Никола Даниловски. Нашите мисли во овие моменти се со семејството на Никола, на кое му изразуваме длабоко сочувство. Загубата е огромна и не постојат зборови на утеха кои можат да ја намалат големата болка – стои во пораката од РК Охрид.

Пред да направи трансфер во редовите на РК Охрид, ги бранеше боите на Металург и Пелистер, а исто така повремено беше дел и од составот на нашата сениорска репрезентација.

Во текот на денешните утринските часови безживотното тело на Даниловски било пронајдено во водите на Охридското езеро, кај туристичката населба Лагадин.

Првичните информации велат на телото дека немало траги од насилство. СВР Охрид во присуство на јавен обвинител извршила увид на местото, а самата истрага треба да ги покаже околностите и причините за настапувањето на смртта.