Португалија ќе отстапи пет отсто од своите дози на вакцини за поранешните колонии во Африка
Португалија во втората половина од годината ќе испрати пет проценти од своите дози на анти-ковид вакцини на група африкански земји од португалско говорно подрачје, како и на Источен Тимор и Југоисточна Азија, најави денеска министерот за надворешни работи, Аугусто Сантош Силва.
Според програмата на ЕУ за дистрибуција на вакцини, Португалија со 10 милиони жители треба да добие 35 милиони дози, а пет проценти од оваа количина би биле 1,75 милиони дози.
Земјите на кои Португалија би испратила вакцини се нејзините поранешни африкански колонии – Мозамбик, Ангола, Гвинеја-Бисао, Екваторијална Гвинеја, Сао Томе и Принципе и Зеленортски Острови.
Силва пред новинарите изјави дека дистрибуцијата на вакцини во овие земји и на Источен Тимор е дел од „билатералната соработка”.