Порто оптимист дека може да ги освои бодовите во Скопје!
В четврток (22. октомври) од 20.45 часот во Спортскиот центар „Јане Сандански“ во Лигата на шампионите екипата на Вардар 1961 е домаќин на Порто.
Во претходниот натпревар (само втор сезонава) во елитата „црвено-црните“ предводени од тренерот Стевче Алушовски триумфираа над Флензбург, а португалскиот состав во својот четврти меч славеше дома над Пик Сегед, а голем придонес во таа победа имаше македонскиот репрезентативен голман Никола Митревски.
Моментно на табелата во групата „А“ Порто е на третото место со четири бодови, а на шестото место е Вардар 1961 со два. Потсетување поради пандемијата на коронавирус, нашиот претставник има два меча помалку.
Португалците се оптимисти пред утрешната средба, Порто во Европа постепено расте и нивната цел е нов триумф.
Алушовски: Тактиката на Порто „7 на 6“ е најголема закана за Вардар
– Победивме против Пик Сегед, а сега мораме да бидеме внимателни против Вардар кој игра на домашен терен и веќе докажа дека има голем квалитет. Одиме во Македонија да триумфираме, фокусиравме сме и размислуваме само на освојување на бодовите и така се најдеме при самиот врв во групата. Овој натпревар нема да биде ништо поразличен, како и секогаш имаме високи победнички амбиции – вели централниот бек на Порто, Мигел Мартинс Соареш кој во првите четири дуели за неговиот клуб во ЛШ постигна 18 голови.
Мечот Вардар 1961-Порто ќе биде организиран согласно протоколот за работа и одржување натпревари усвоен од Комисијата за заразни болести при Министерството за здравство на Република Северна Македонија и истиот ќе биде без присуство на публика.