Пораз и за Еурофарм Пелистер на стартот од СЕХА лигата
По поразот на Вардар од Татаран и вториот македонски претставник во СЕХА лигата сезоната ја стартуваше со пораз.
Еурофарм Пелистер вечерва беше убедливо поразен во Нови Сад на гостувањето кај Војводина. Српскиот шампион славеше убедлива победа од 29:24. Битолскиот клуб денес одигра очајно второто полувреме во кое Војводина ја направи разлика.
На полувремето резултатот беше 14:14, но потоа „пелистерци“ стартуваа со негатива од 4:1 во вториот дел. Се до 43. минута македонскиот претставник беше на два постигнати гола, а противникот тоа знаеше да го искористи и дојде до највисоките 25:18.
Кратката криза на Војводина и одбраните на Марко Кизиќ беа причина за мала надеж на избраниците на Ларс Валтер, сепак домаќините не дозволија да ја испуштат убедливата предност и запишаа победа.
Најефикасен кај Еурофарм Пелистер беше Ненад Костески кој постигна седум гола, Кизиќ собра седум одбрани. Во вториот натпревар Еурофарм Пелистер ќе се соочи со Нексе на гостински терен на 2. февруари.