Британски државјанин е приведен во Украина под сомнение за шпионажа за Русија, а Украинската безбедносна служба (СБУ) тврди дека тој се подготвувал и за извршување терористички напади. Се верува дека осомничениот е поранешен член на британските вооружени сили, а истрагата се спроведува во соработка со британските разузнавачки служби, објави Скај њуз.

Според соопштението на СБУ, човекот пристигнал во Украина на почетокот на минатата година за да работи како инструктор за обука за украинската армија. Сепак, украинските власти тврдат дека потоа бил регрутиран од руската разузнавачка агенција ФСБ, привлечен од ветувањето за „лесни пари“.

Планирани терористички напади

Во серија сериозни обвинувања, СБУ тврди дека Британецот ѝ дал на Русија класифицирани информации за украинската војска. Информациите што тој наводно ги споделил вклучуваат координати на воени центри за обука во јужна Украина и детали за странски инструктори кои работат со украинските вооружени сили.

Се тврди дека се подготвувал и за извршување терористички напади. Обвинет е дека добивал инструкции за тоа како да направи импровизирана експлозивна направа, како и информации за тоа каде да пронајде скриен пиштол со два наполнети шаржери. Човекот беше приведен во октомври, но дополнителни детали за случајот, вклучително и неговото име, беа објавени дури денес во украинските медиуми.

Тој е обвинет за неовластено пренесување информации до Русија и се соочува со затворска казна до 12 години доколку биде осуден. Скај њуз во меѓувреме побара коментар од Министерството за надворешни работи на Велика Британија.