Ако планирате одмор во Италија, едно правило на островот Капри може скапо да ве чини. Властите ја забранија употребата на пластика за еднократна употреба уште во 2019 година, а казните за прекршителите се до 500 евра. Туристите се најчесто на удар, бидејќи честопати не знаат за прописот.

Капри, гламурозен остров во Тиренското Море во близина на Неапол, годишно го посетуваат околу 2,7 милиони туристи. Токму поради огромниот притисок од масовниот туризам, локалните власти воведоа строги мерки за заштита на животната средина.

Што вклучува забраната?

Забраната вклучува: пластични шишиња за вода, ќеси, чаши, сламки, прибор за јадење за еднократна употреба, пластични мешалки за кафе.

Регулативата се применува во барови, ресторани и продавници, но проблемот најчесто се појавува кај еднодневните туристи кои со траект доаѓаат од Неапол, со пластични шишиња во ранците.

Според важечките правила, секој што користи или внесува пластично шише за еднократна употреба може да биде казнет со казна до 500 евра. Локалните власти истакнуваат дека мерката не е воведена за казнување на туристите, туку за намалување на количината на отпад на островот со ограничени ресурси.

Експертите предупредуваат дека многу посетители не се свесни за правилата, но дека тоа не претставува олеснителна околност. Исклучоци не се прават, а контролите се особено засилени во текот на летната сезона.

Што треба да направат туристите за да избегнат казна?

– користете шишиња за вода за повеќекратна употреба
– понесете метални или стаклени шишиња
– избегнувајте амбалажа за еднократна употреба
– проверете ги локалните правила пред да пристигнете

Капри, остров познат по луксузот и познатите личности, во последниве години сè повеќе се обидува да ги контролира последиците од масовниот туризам. Еколошките мерки стануваат дел од стратегијата за зачувување на природната убавина што го направија светски позната дестинација.

Ако планирате еднодневен излет од Неапол, внимателно проверете ја содржината на вашата торба – едно пластично шише може да ве чини колку еден викенд аранжман.