Полските безбедносни служби приведоа 19-годишен студент осомничен за обид за воспоставување контакти со Исламска држава и обвинет за подготовка на напад на божиќен пазар што можел да предизвика масовни жртви, соопштија денеска властите, пренесува Ројтерс.

Матеуш В., студент на Католичкиот универзитет во Лублин, сакал да изврши напад со употреба на експлозиви и планирал да се приклучи на терористичка организација, изјави Јацек Добжински, портпарол на полските специјални служби.

„Мажот бил многу фасциниран од исламот, се обидел да воспостави контакти со Исламската држава и подготвувал напад во Полска, во еден од градовите за време на божиќен базар“, рече Добжински за време на прес-конференција.

Тој одби да каже во кој град требало да се изврши нападот за да „не предизвика паника“.

Тој додаде дека човекот бил приведен кон крајот на ноември во неговиот стан во Лублин, источна Полска, а службениците на Агенцијата за внатрешна безбедност заплениле носачи на податоци и предмети поврзани со исламот.

Обвинителството го обвини Матеуш В. за „преземање подготвителни дејствија за извршување терористички напад што можел да резултира со смрт или сериозни повреди на многу луѓе“. Судот му одреди притвор од три месеци.

Кон средината на јуни, Полска обвини тројца 19-годишни мажи осомничени за собирање пиротехнички материјали и планирање терористички акции, наводно вклучувајќи напад врз училиште во северниот полски град Олштин.

„Вие сте запознаени со ова прашање од Олштин, сега имаме уште еден пример за подготовка на напад пред Божиќ“, рече Добжински. „Шокирани сме од инцидентот во Сиднеј, шокирани сме од нападите што се случија во претходните години пред Божиќ во други европски земји. Да останеме будни.“