Полицијата го повикала поранешниот министер и вицепремиер Љупчо Николовски на службен разговор
Премиерот Христијан Мицкоски пред неполн месец рече дека имал „чувство“ дека наскоро за корупција ќе се гонат поранешни функционери
Поранешниот министер за земјоделство, шумарство и водостопанство и вицепремиер задолжен за борба против корупцијата, Љупчо Николовски, бил повикан во СВР Скопје на службен разговор, потврди МВР откако објавија повеќе медиуми.
Препорачано
Од МВР информираа дека Николовски бил повикан минатата недела, на 7 мај, во Единицата за економски криминал и корупција. Во тек се дополнителни активности поврзани со случајот.
Според информациите, Николовски е осомничен за злоупотреба на јавна набавка која ја спровел додека бил министер за повеќе од 800.000 евра, спротивно на Законот за јавни набавки. Тој дал исказ, откако наводно го пријавиле земјоделци кои тврдат дека се оштетени за исплати од Министерството.
Ова се случува неполн месец откако премиерот Христијан Мицкоски рече дека имал „чувство“ дека наскоро за корупција ќе се гонат поранешни функционери.
Дел од медиумите објавија и дека поранешниот министер и вицепремиер Николовски пред истражните органи посочил оти тој постапувал согласно владина уредба со која му било дадено дискреционо право да одлучува на кои земјоделци можат да им се доделат парите од програма на Министерството за земјоделство.
