80-годишен жител на Македонска Каменица останал заглавен на балконот од неговата куќа која горела, а животот му го спасиле полицајци кои го симнале со скала, соопшти МВР.

Полицијата објави и фотографија од спасувањето, на која се гледаат полицајците без никаква заштитна опрема, кои му помагаат на старецот да се спушти.

„На 15.02.2026 во 13:23 часот во СВР Штип е пријавено дека на ул.„14 Јуни“ во Македонска Каменица настанал пожар во куќа, сопственост на Љ.Ѓ.(80). Полициски службеници од СВР Штип – Полициско одделение Македонска Каменица излегле на местото и го затекнале сопственикот заглавен на тераса на вториот кат, по што се преземени мерки и со помош на скали безбедно го спуштиле. Нему му е укажана помош во Клиничка болница Штип поради вдишување чад, по што е пренесен во Комплекс клиники „Мајка Тереза“ во Скопје за понатамошно лекување“, велат од полицијата.

Пожарот е изгаснат од Територијалната протипожарната единица Македонска Каменица. Увид е извршен.