Екипата на Нант предводена од капитенот и селектор на македонската репрезентација, Кире Лазаров, направи вистински подвиг и во реваншот успеа да го совлада Киелце со 31:34 и да се пласира во четвртфиналето во Лигата на шампионите.
Ракометатите на Нант во реваншот кој се играше во Киелце, успеаја да слават со три гола (31:34) и со тоа ја анулираа негативата од првиот натпревар кој заврши со минимален триумф на полскиот тим.

Првото полувреме помина во подобра игра на Нант, гостинските ракометари постојано беа во водство, најголемото изнесуваше  три гола (2:5,8:11), а на одмор заминаа со два гола предност (13:15).
Во второто полувреме, ракометарите на Киелце успеаја да се вратат во игра и со голот на Кулеш во 41. минута да дојдат до израмнување. Полјаците предноста од еден гол ја одржуваа до 47. Минута, кога Нант со три гола во серија, од кои два даде Лазаров повторно ја врати предноста (25:27). Киелце направи уште еден обид да дојде до реми кое ќе ги однесеше во четвртфиналето, преку Турнат во 57. минута дојде до израмнување на 30:30, но за две минути Пелмабек и Ривера постигнаа голови и ја заверија победата на Нант.

Кире Лазаров одигра одлична партија постигнувајќи четири гола, а имаше и уште пет асистенции, Валеро Ривера постигна девет гола, а на голот на Нант блескаше Емил Нилсен кој имаше 18 одбрани. Во редовите на Киелце најпрецизен беше Кулеш со шест постигнати голови.