Почина Нико Стојан, познатиот берлински диџеј, продуцент и еден од основачите на издавачката куќа „Уије“. Веста за неговата смрт беше објавена на неговите профили на социјалните мрежи. Причината за смртта засега не е соопштена, пренесе „Резидент адвајзор“.

Стојан е роден и израснал во Берлин, а со музика почнал да се занимава во деведесеттите години, кога ги открил грамофоните во дискотеката на својот вујко. Неговите музички почетоци биле поврзани со хип-хопот, џезот, соулот и фанкот, пред да се насочи кон хаусот и техното.

Тој стана една од препознатливите фигури на берлинската андерграунд-сцена како резидент на легендарниот клуб „Бар 25“. Со своите топли и мелодични сетови придонесе за музичкиот идентитет на клубот, а подоцна настапуваше во „Панорама бар“, „Вотергејт“ и во клубови и на фестивали низ светот.

Неговата музика беше објавувана за издавачките куќи „Кросстаун ребелс“, „Киндиш“, „Сонара“ и „Бар 25 мјузик“. Заедно со Ацид Паули ја основа и издавачката куќа „Уије“.

Колегите и пријателите се простуваат од Стојан како од исклучителен музичар, но и како од топол и добар човек, чија музика остави длабока трага во берлинската и светската електронска сцена.