Пет „здрави“ намирници кои всушност предизвикуваат надуеност
Надуеноста може да го уништи дури и најдобриот оброк, а најчесто е предизвикано од храната што ја јадеме секој ден. Диететичарката Саманта Диерас објаснува дека надуеноста е чувство на притисок и напнатост во абдоменот и е предизвикана од вишок гасови во дигестивниот систем.
Препорачано
Може да се појави од повеќе причини, вклучувајќи раст на бактерии, голтање воздух, џвакање мастика, одредени лекови и храна богата со „ФОДМАП“ (вид јаглехидрати што тешко се вари). Иако надуеноста е честа појава и обично исчезнува сама по себе, може да се ублажи со избегнување на одредени намирници. Диерас откри за кои намирници станува збор.
Грав и леќа
Гравот и леќата се хранливо вредни, но се сметаат за храна со висока содржина на „ФОДМАП“. Саманта Диерас советува луѓето кои често доживуваат надуеност да ги заменат со други извори на квалитетни протеини, како што се месо или киноа, пишува „Вог“.
Брокула
Брокулата и другиот вкрстен зеленчук, како што се карфиолот и зелката, се исто така храна со висока содржина на „ФОДМАП“ што често предизвикува надуеност. Диерас препорачува зеленчук како тиквички, зелен грав, пиперки, аспарагус, модар патлиџан и целер како поблага алтернатива.
Прокељ
Прокељот е уште еден вкрстен зеленчук кој лесно може да предизвика надуеност. Како замена, Диерас предлага зеленчук како краставици, домати и моркови.
Млеко, сладолед и други млечни производи
Млечните производи содржат лактоза и се сметаат за храна со висока содржина на „FODMAP“. Диерас советува претпазливост кај луѓето кои често доживуваат надуеност и препорачува производи со ниска содржина на лактоза или без лактоза, што го препорачува и клиниката Мајо.
Газирани пијалаци
Газираните пијалаци можат да предизвикаат надуеност бидејќи содржат јаглерод диоксид, еден вид гас. Студиите потврдуваат дека голтањето гасови го зголемува притисокот во желудникот и предизвикува непријатно чувство на напнатост. Најдобрата алтернатива е обичната вода, која обезбедува дополнителна хидратација.
Ако често се чувствувате надуено, идентификувањето на храната што ве мачи е првиот чекор кон полесен, попријатен и порелаксиран дигестивен ден.
