Кремљ денеска нагласи дека е погрешно да се зборува за откажување на средбата меѓу рускиот претседател Владимир Путин и американскиот претседател Доналд Трамп, но додаде дека подготовката за неа е неопходна, објави државната телевизија Вести на својот Телеграм канал, пренесува Ројтерс.

„Претседателите не можат да се сретнат само заради средба, не можат само да си го губат времето и се отворени за тоа. Затоа им наложија на (рускиот министер за надворешни работи Сергеј) Лавров и (американскиот државен секретар Марко) Рубио да го подготват овој процес. Процесот е комплициран“, изјави портпаролот на рускиот претседател Дмитриј Песков за новинарот на државната телевизија од Кремљ, Павел Зарубин.

Песков, исто така, ги коментираше санкциите што САД ги воведоа врз руските нафтени гиганти Лукоил и Роснефт, нарекувајќи ги „непријателски чекор“, но рече дека Русија се стреми да гради пријателски односи со сите земји, вклучително и со САД.

„Секако, дејствијата преземени оваа недела беа непријателски чекор. Тие навистина ги оштетија перспективите за обновување на нашите односи. Но, тоа не значи дека треба да се откажеме од овие очекувања. Треба да го правиме она што е добро за нас“, рече Песков.

„И покрај различните нијанси што ги искажа претседателот на Соединетите Американски Држави, ние сепак мора да бидеме ориентирани кон нашите интереси. Нашите интереси се да градиме добри односи со сите земји, вклучително и со Соединетите Американски Држави“, му рече Песков на Зарубин.

Портпаролот на рускиот претседател, исто така, изјави дека Русија ќе го гони секој што ќе биде вмешан во евентуално запленување на замрзнати руски средства.