Патувачкиот фестивал „Културен амалгам“, кој почна во Културно-информативниот центар во Скопје и продолжи во Крива Паланка, на 7 август продолжува на својата следна станица, во Центарот за култура „Трајко Прокопиев“ во Куманово, каде настанот ќе биде отворен во 20 часот.

Публиката ќе има можност да ја проследи ревијалната изложба „ФотоСинтеза“, која прикажува редок избор на алтернативна фотографија, со техники како цијанотипија, гумоил и вандајк, а ќе бидат изложени дела на над 40 автори, кои го оживуваат минатото со современа чувствителност.

По изложбата, ќе следува и проекција на документарниот филм „Манaки – приказна во слики“ на Роберт Јанкулоски по сценарио на Илинденка Петрушева, посветен на животот и делото на првите балкански кинематографери браќата Манаки, со внимателно истражен и документарен пристап кон нивното наследство.

Овој мултимедијален и интердисциплинарен фестивал е иницијатива на Културно-информативен центар (КИЦ) – Скопје, со цел децентрализација на културата во Македонија и поттикнување на соработка меѓу сродните културни институции низ земјата.

Настанот е бесплатен и отворен за сите љубители на уметноста и фотографијата. Фестивалот е поддржан од Министерството за култура и туризам на Македонија, известија од КИЦ – Скопје.