Во рамките на фестивалската програма на „Охридско лето“ на 21 јули со „Алумни – концерт“ ќе се одбележат 60 години Факултет за музичка уметност при Универзитетот „Св. „Кирил и Методиј“ – Скопје.

Во катедралната црква „Света Софија“ ќе настапат Kатерина Костадиновска – Гелебешева, Глигор Гелебешев, Кристина Светиева, Милена Арсовска, Весна Гиновска Илкова, Златко Мадевски, Ана Дурловски, Игор Дурловски, Надица Ристиќ – Симовиќ, Дарко Багески и Јанинка Навчева.

На програмата се дела од композиторите Морлачи, Пуланк, Лист, Лалие, Белини, Верди, Фон Супе, Хачатурјан и Пјацола. Почетокот на концертот е во 21 часот.

Мрежата „Алумни“ има за цел да ги поврзе сите генерации студенти и да создаде платформа за континуирана соработка, размена на искуства и поддршка во професионалниот и личниот развој. Таа овозможува и поврзување со стопанството, образовните и истражувачките институции на национално и на меѓународно ниво.

Преку оваа мрежа, поранешните студенти можат да останат во контакт со своите колеги и професори, да се вклучат во различни иницијативи и активности, да придонесат кон унапредување на универзитетската и пошироката академска заедница.