Партизан има нов тренер: На местото на Милошевиќ доаѓа миленикот на навивачите
Српскиот прволигаш Партизан го назначи Александар Станојевиќ за нов тренер откако клупската легенда Саво Милошевиќ си поднесе оставка.
До ваквиот расплет дојде само два дена по поразот на Партизан од Војводина со 3:2 на натпреварот од српскиот шампионат, а на кој Милошевиќ заработи и црвен картон бидејќи го гаѓаше судијата со шише вода.
„Црно-белите“ по шест кола во шампионатот на нашиот северен сосед забележа четири победи и два порази и се наоѓаат на петтото место на табелата со шест бода помалку од лидерот Црвена Звезда.
Саво Милошевиќ на клупата на Партизан се задржа една ипол година, а воедно ова му беше и прво искуство како главен тренер на една екипа.
На негово место доаѓа миленикот на навивачите, Александар Станојевиќ кој се враќа во клубот по осум години. Оттогаш Станојевиќ беше тренер на неколку кинески екипи како и на Макаби Хаифа и на ПАОК.