Паркинзи за станарите и велосипедски патеки на обновената Ленинова
После шестмесечна реконструкција, заврши обновата на улицата Ленинова, која според градоначалникот Горан Герасимовски сега е модерно уредена со многу зеленило, велосипедски патеки и паркинзи за станарите.
Во изминатиот период на улицата се работеше на поставување атмосферска, водоводна и фекална канализација, подземно се спушти кабловската мрежа и се отстранети старите дрвени бандери со што се ослободија тротоарите.
На улицата се поставени паркинзи за велосипеди, се обележаа велосипедски патеки од двете страни на улицата, се оформија и паркинзи за резидентните станари. Улицата Ленинова е една од главните артерии во Општина Центар и мило ми е што по оваа реконструкција граѓаните кои живеат овде но и посетителите ќе имаат убаво уредена и современа улица. Со поставувањето на завршниот слој асфалт, новите канделабри и урбаната опрема улица „Ленинова“ го доби и финалниот лик налик европските улици – вели градоначалникот на Општина Центар Горан Герасимовски.
Покрај новата урбана опрема на улицата исто така се оформи и зеленилото со закројување на крошните од дрвјата кои го попречуваа видикот и ги оштетуваа фасадите на станбените згради.