Отворањето на Уставот е сензитивна работа, смета Гаши
Претседателот на Собранието, Африм Гаши, вели дека отворањето на Уставот е сензитивна работа и договор помеѓу политичките партии. Тој нагласи дека се работи за политичко прашање за кое е потребен консензус од две третини од пратениците во Собранието.
Препорачано
„Отворање на Устав е сензитивна работа, пред сè работа на договор помеѓу политичките партии и тоа знаете дека во Собрание треба две третини од пратениците да се договорат да отворат Устав“, изјави Гаши.
Тој рече дека ќе остави политичките партии да донесат одлука за тоа кога е потребно да се направи тоа и околу кои прашања.
Во однос на дебатите за примена на Бадентеровиот принцип во Уставниот суд, смета дека не треба тоа да биде табу тема и дека треба да се разговара за тоа. Тој сепак нагласи дека фокусот треба да биде основната улога на судот.
„Треба да се разговара од два аспекти – од апсект на политичка димензија и професионалниот аспект. Пред сè треба да го имаме на ум фактот дека Уставниот суд треба да ја одигра својата улога како што му е пропишано во Уставот, а тоа е да го брани Уставот и уставноста на донесување на законите во државата. И затоа не треба да гледаме да имаме предрасуди кон темите кои носат до квалитетното одлучување, туку пред сè треба да имаме на ум каков Уставен суд ќе имаме“, нагласи Гаши.
Собранието рече дека работи максимално експедитивно на реформската агенда и дека досега нема застој во гласањето на законите што пристигнуваат во архивата. Според него, брзината на процесот зависи од капацитетите на министерствата и комуникацијата со Европската комисија.
Тој додаде дека веќе се пристигнати два клучни закона – за Јавни обвинители и за Советот на јавни обвинители, кои веднаш ќе бидат процесуирани до пратениците. Гаши очекува до крајот на годината темпото на носење реформски закони дополнително да се засили.
„Моментално во собрание имаме два закони, едниот е за јавни обвинители, а другиот е за Советот на јавни обвинители. Очекуваме од владата да доаѓаат повеќе закони, знам дека таму се работи интензивно“, рече Гаши.
Претседателот на Собранието очекува до крајот на годината темпото на носење реформски закони дополнително да се засили.
