Под услов Киев да го препушти целиот Донбас на Русија, САД ќе понудат безбедносни гаранции за Украина, изјави денеска украинскиот претседател Володимир Зеленски. Според неговите зборови, поради војната меѓу САД и Израел против Иран, американскиот претседател Доналд Трамп врши притисок врз Украина што побрзо да ја заврши војната со Русија, пренесува Ројтерс.

„Блискиот Исток дефинитивно има влијание врз претседателот Трамп и неговите следни чекори. Претседателот Трамп, за жал, според мое мислење, и понатаму избира стратегија да изврши поголем притисок врз украинската страна“, рече Зеленски.

Украинскиот лидер повеќепати истакна дека се потребни цврсти безбедносни гаранции од меѓународните партнери за да се обезбеди Русија во иднина повторно да не ја нападне Украина, доколку се постигне мировен договор.

„Американците се подготвени да ги финализираат овие гаранции на високо ниво веднаш штом Украина биде подготвена да се повлече од Донбас“, рече тој.

Тој предупреди дека таквото повлекување би ја загрозило безбедноста и на Украина и, посредно, на Европа, бидејќи на Русија би ѝ ги предало силните одбранбени позиции во регионот.

Белата куќа засега не одговори на барањето за коментар.

Зеленски во јануари изјави дека документот за безбедносни гаранции меѓу Украина и САД е „сто отсто подготвен“ и чека на потпишување.

Потоа, во вторникот, по разговорите меѓу американски и украински претставници во Мајами, изјави дека сè уште има работа што треба да се заврши.

Русија постепено напредува на боиштето во источна Украина, наведува Ројтерс. Воените аналитичари велат дека на Русија би ѝ биле потребни неколку години и значителен број војници за целосно да го освои регионот, кој го вклучува таканаречениот „Појас на тврдини“ од градови силно утврдени од украинската војска.

Украинските власти претходно изразија страв дека испораките на американските ракети „Патриот“ – единствените што можат да соборуваат руски балистички проектили – би можеле да пресушат поради конфликтот со Иран.

„Испораките не се запрени. Многу сум благодарен на претседателот Трамп и на неговиот тим. Но ова снабдување со ракети „Патриот“ не е доволно големо колку што ни е потребно“, рече Зеленски.

Зеленски: Војната на Блискиот Исток ќе ја лиши Украина од ракети

Зеленски: Нетанјаху го има она што ми треба, јас го имам она што нему му треба