Володимир Зеленски изјави дека Украина ќе се соочи со недостиг на ракети за борба против Русија, поради војната на Блискиот Исток.

Во интервју за Би-Би-Си, украинскиот претседател рече дека Владимир Путин сака „долготрајна војна“ меѓу САД, Израел и Иран, бидејќи тоа би го ослабнало Киев, а американските ресурси би биле насочени на друго место.

Зеленски, исто така, тврдеше дека американскиот претседател Доналд Трамп не е „на ниедна страна“ во војната меѓу Русија и Украина и не сака да го „вознемирува“ Путин.

Украинскиот претседател рече дека има „многу лошо претчувство“ за влијанието на конфликтот врз војната во Украина, нагласувајќи дека мировните преговори „постојано се одложуваат. Постои една причина – војната во Иран“.

Тој додаде дека ситуацијата му користи на Путин, бидејќи ги зголемува цените на енергијата – што е проблем за Украина – и значи дека може да има „недостаток“ на ракети.

„За Путин, долгата војна во Иран е позитивна“, рече тој. „Покрај цените на енергијата, тоа значи и исцрпување на американските резерви и исцрпување на производството на системи за воздушна одбрана. Значи, имаме и исцрпување на ресурсите.“

Зеленски рече дека „сигурно“ ќе има недостиг од ракети „Патриот“, што би претставувало „предизвик“, додавајќи дека прашањето сега е „кога ќе се потрошат сите залихи на Блискиот Исток“.

„Америка произведува 60-65 ракети месечно. Замислете, 65 месечно се околу 700-800 ракети годишно“, рече тој. „А на првиот ден од војната на Блискиот Исток, беа употребени 803 ракети“, истакна тој.

Зеленски, исто така, зборуваше за ставот на американскиот претседател за војната во Украина, велејќи дека Трамп сака да дејствува како посредник, а не да заземе страна во руската инвазија.

Украинскиот претседател рече дека верува оти Трамп „сака да ја заврши оваа војна“, но додаде дека тој и неговите советници избрале стратегија на близок дијалог со Путин и „да не го вознемируваат, бидејќи Европа го вознемирува, а Путин не сака да разговара со Европа“.