Во продолжение на акцијата „Армагедон“, српската полиција приведе осуммина осомничени за кривични дела поврзани со незаконско прикажување, набавување и поседување недозволени содржини, како и за злоупотреба на малолетни лица преку интернет, пишуваат српските медиуми.

Уапсените се на возраст од 24 до 64 години, а меѓу нив има и еден државјанин на Русија. Во подолг временски период тие преку интернет разменувале и чувале недозволени дигитални материјали.

Тројца од осомничените преку социјални мрежи и комуникациски апликации отвориле лажни профили, претставувајќи се како малолетни девојчиња, по што воспоставувале контакт со други деца, од кои барале и добивале недозволени фото и видеосодржини.

При претреси на станови и други простории кај сите осомничени, на електронските уреди биле пронајдени дигитални материјали кои, според надлежните, претставуваат доказ за сериозни злоупотреби на малолетни лица, се наведува во соопштението.

Акцијата „Армагедон“ е повеќегодишна специјализирана полициска операција насочена кон откривање и сузбивање на кривични дела поврзани со злоупотреба на деца и малолетници во онлајн-просторот.

Во рамки на акцијата, полицијата континуирано следи активности на интернет, социјални мрежи и комуникациски апликации, со цел идентификување лица кои користат лажни профили и вршат нелегални дејствија на штета на малолетници.

Според српското Министерство за внатрешни работи, последната фаза од акцијата била реализирана и како дел од поширока меѓународна операција за спречување на онлајн-злоупотреби и зајакнување на меѓународната соработка во оваа област.