Јавното обвинителство информира дека истрагата за убиството во општина Старо Нагоричане е во тек. Основното јавно обвинителство Куманово, заедно со надлежните институции, спроведува активности за прибирање докази со цел целосно расветлување на случајот. Засега, обдукцискиот извештај не е доставен до обвинителството, а во наредните денови осомничениот ќе биде подложен на психијатриска проценка од тим експерти.

-Основното јавно обвинителство Куманово и сите надлежни институции и органи преземаат огромен број дејствија за обезбедување докази за целосно расчистување на овие настани. Осомничениот е обезбеден и во следните денови ќе следи негова психијатриска проценка од тим на експерти. До овој момент вештиот наод од извршената обдукција на ексхумираното тело не е доставен до јавниот обвинител. Во текот на оваа сложена постапка се вршат распити на лица, а ќе бидат обезбедени и сите други потребни докази за целосно расчистување на случаите, но во оваа фаза од постапката во интерес на истрагата не може да се споделуваат повеќе детали – соопштија од ЈОРСМ, пренесе МИА.

Според полицијата, на 12 февруари осомничениот Т.Б. (25) од село Малотино влегол во домот на 78-годишната М.С. во село Драгоманце, ја нападнал и ја задушил со перница, по што таа починала на местото. Тој е лишен од слобода и се сомничи за кривично дело убиство по член 123 од Кривичниот законик.

Жителите на општината Старо Нагоричане живеат во страв и неизвесност по апсењето. Дел од семејствата ги префрлиле своите постари родители од селата, а останатите изразуваат загриженост за личната безбедност. Осомничениот бил познат во средината како мирен и повлечен, се движел со велосипед и чувал добиток.

Психијатрите препорачуваат семејствата на жртвите да побараат лекарска помош доколку почувствуваат симптоми на посттрауматски стрес, како несоница, главоболки или срцебиење.

Убиството на 78-годишната жена, која живеела сама во Старо Нагоричане и која била претепана и задушена со перница, доведе до апсењето на осомничениот. По ова убиство се прошири истрагата и за уште четири други убиства.

86-годишна жена од Челопек успеала да преживее брутален напад во својот дом. Напаѓачот влегол додека била сама, а ја спасил случаен шум поради кој избегал, оставајќи ја повредена и во крв.

Во меѓувреме се појави и снимка од осомничениот сериски убиец, како се обидува да влезе во куќа, но вратата е заклучена.

Жена од Челопек сведочи за напад во домот: „Ми фрли ќебе преку глава и ме фати за гуша“