Малиџано или зелен ајвар е традиционален балкански намаз, кој понекогаш по боја наликува на песто. Се подготвува главно од пасиран модар патлиџан, зелени пиперки, лук и масло. Името го добило од италијанскиот збор за модар патлиџан – меланзане (melanzane).

Иако малкумина знаат, сепак, подготовката на оригинално малиџано се прави исклучиво со зелени ајварки пиперки.
Малиџаното е карактеристично за Македонија, но популарно е и во другите балкански земји – Хрватска, Србија, Босна и Херцеговина, каде што рецептот за малиџано претрпе неколку промени.

На пример, на некои места во модриот патлиџан и пиперките се додаваат сирење и јаткасти плодови, како ореви. Во секој случај, резултатот е секогаш исклучителен и финалниот намаз е навистина волшебен.

Малиџаното секогаш се служи со парче леб. А кога ќе се додадат маслинки или сирење, добиваме незаборавен сендвич.

Состојки:

– 12 кг зелени пиперки
– 10 кг модар патлиџан
– 2 литри масло за јадење
– 150 грама шеќер
– 130 мл вински оцет
– 3 лажици сенф
– 2 лажици сол
– 1 лажица шеќер

Подготовка:

Најпрви убаво измијте ги и испечете ги модрите патлиџани и пиперките.
Откако ќе завршите со нивното печење, почнете со лупењето, а потоа убаво измелете ги со машинка за мелење на месо.
Добиената смеса сипете ја да се пржи во поголемо тенџере, во кое претходно сте загреале мешавина од масло, оцет, сол и шеќер.

Пржете околу 3 часа, а пред малиџаното да биде готово, додајте му го сенфот.

Најверојатно од оваа количина пиперки и модри патлиџани ќе ви испаднат околу 10 тегли.

Врелото малиџано се собира во врели тегли, кои се виткаат со крпи за постепено да се изладат и да се вакумираат за да можат да бидат квалитетни за јадење во текот на зимскиот период.