Општина Аеродром започнува со контрола и мерења на прекумерната бучава заради заштита на здравјето, мирот и квалитетот на живеење на граѓаните.

Оттаму информираат дека овластените општински инспектори за животна средина ќе спроведуваат интензивни и континуирани контроли, со посебен фокус на угостителските и туристичките објекти, со цел доследно почитување на законските одредби.

За непочитување на законските норми предвидени се високи санкции, и тоа:

• глоба од 6.000 до 7.000 евра (во денарска противвредност) за микро трговци,
• од 13.000 до 14.000 евра за мали трговци,
• од 37.000 до 41.000 евра за средни трговци,
• од 62.000 до 69.000 евра за големи трговци,
• како и глоба од 2.000 евра за трговец поединец.

Глобите се изрекуваат доколку нивото на бучава при вршење на угостителска или туристичка дејност ги надминува пропишаните гранични вредности.

Согласно со член 9 од Законот за заштита од бучава во животната средина, забрането е емитирање бучава над пропишаните гранични вредности. Во станбените објекти, во вечерниот период од 19 до 23 часот, дозволеното ниво на бучава не смее да надмине 35 dBA, а во ноќниот период од 23 до 7 часот, дозволеното ниво на бучава не смее да надмине 30 dBA.

Општина Аеродром упатува апел до граѓаните, доколку се изложени на прекумерна бучава, случаите веднаш да ги пријават на електронската адреса: [email protected]