На вчерашната вонредна седница на Советот на Општина Маврово и Ростуше, ја задолжи Општината да поднесе барање до Владата за прогласување кризна состојба поради големиот број мечки кои претставуваат опасност за животот и имотот на жителите.

Во писмениот допис до Владата, од Општината посочуваат дека мечките, кои според податоците на Националниот парк „Маврово“, се околу 160-180 на број на оваа територија, предизвикуваат големи материјални штети особено на пчеларите, сточарите, земјоделците, како и на домовите на жителите на општината за што, како што додаваат, е повеќепати пријавувано до надлежните.

Посочуваат оти зголеменото присуство на мечките е животозагрозувачко по граѓаните и бараат од Владата да предложи конкретни мерки и активности за решавање на настанатата ситуација.

„Општина Маврово и Ростуше ги презеде сите активности и мерки кои се во своја надлежност, сè со цел да ги заштити своите граѓани. Одржани се состаноци со месните заедници на сите населени места во Општина Маврово и Ростуше, полициските одделенија во Ростуше и Маврово, граничните полициски станици во Жировница и Стрезимир, ЈУНП Маврово, претставници од Министерството за земјоделство, шумарство водостопанство и претставници од Министерството за животна средина и просторно планирање“,велат од Општината.

Дополнително, од Општината ги повикуваат надлежните министерства, Националниот парк „Маврово“, Центарот за управување со кризи (ЦУК) и другите надлежни институции да се стават во функција за што поскоро решавање на проблемот, со цел враќање на безбедноста на граѓаните.

Со истиот проблем се соочуваат и жителите на шарпланинските села коишто се жалат дека се почесто мечките им се „ненајавени гости“ во нивните дворови, и стравуваат за својата безбедност и на своите блиски.

Во селото Жировница убиени мечка и две мечиња

ФОТО | Мечка влегла во дворот на екс пратеникот Љатиф Пајкоски: Умоболни бирократчиња ја штитат мечката, но не и населението