Официјално: Фазли се врати во Шкендија
Како што и официјално објави ФК Шкендија, по само пет месеци откако замина, во екипата се враќа Самир Фазли за продолжението од сезоната.
– Среќен сум што повторно ќе бидам дел од Шкендија и покрај лошиот старт оваа сезона, верувам дека и годинава ќе бидеме шампионот. Оваа екипа има квалитет, лесно ќе се адаптирам и подготвен сум да дадам максимум за исполнување на клупските цели – рече Фазли.
28-годишниот напаѓач веќе им се придружи на своите соиграчи на тренинзите, а бидејќи не се регистрирал за друг клуб, автоматски се стекнува со правото да игра за Шкендија и тренерот Ернест Ѓока.
Во кариерата ги бранеше уште боите на Македонија ЃП, холандските Херенвен и Хелмонд Спорт, швајцарскиот Вил и хрватскиот Рудеш. Има седум настапи за најдобрата македонска репрезентација.
Претходно тетовскиот клуб го промовираше првото зимско засилување.