Градската управа на Сараево донесе одлука за пренамена на 15.000 евра, средства што беа планирани за церемонии, огномет и прослава на Нова година, за набавка на вакцини против ковид-19.

Покрај огнометот, во Сараево за новогодишната ноќ бил планиран и онлајн концерт, што, сепак, е одложен поради пандемијата, јавува порталот Кликс.ба.

– Најважни се нашите граѓани и нивното здравје и безбедност. Сите мора да се однесуваме одговорно и да се придржуваме кон епидемиолошките мерки додека не пристигне вакцината, порачуваат од Градската управа на главниот град на БиХ.

Од таму апелираат на трпение, на одговорност и на грижа за себе и за блиските и на граѓаните им посакаа да ја минат новогодишната ноќ во кругот на семејство.

Единствената традиција што ќе остане оваа година е посетата на градоначалникот на сите градски служби кои работат на новогодишната ноќ со, секако, почитување на епидемиолошките мерки.