Од 5.179 до 690 евра: Која земја на ЕУ има најголема, а која најниска просечна бруто плата
Данска, Луксембург и Германија се на првите три позиции.
Кризата „Ковид-19“ ја потресе светската економија, но некои поразвиени земји поминаа многу подобро за разлика од останатите. Успеаја да ги зачуваат работните места, минимално да се задолжат и да ги задржат просечните плати на оптимално ниво.
„Реинис Фишер“ објави анализа за земјите од Европската унија со највисоки, односно најниски просечни бруто плати на месечно ниво: Данска е на прво место, а Бугарија е на последно место. Треба да се напомене дека во анализата влезе и Велика Британија, која ја напушти ЕУ на почетокот на годината.
Јазот меѓу првата и последната земја на списокот е 7,5 пати во корист на Данска.
Исто така, анализата содржи споредба на сегашните просечни бруто-плати и платите во 2018 година, така што можеме јасно да видиме кој стагнирал, кој напредувал и кој назадувал во последните две години.
Данска во 2020 година има просечна бруто-плата од 5.179 евра, наспроти 5.191 евра во 2018 година. На второ место е Луксембург со 5.143 евра во 2020 година односно 4.412 евра пред две години. На трето место е Германија, каде сегашната просечна бруто-плата е 4.035 евра, додека во 2018 година изнесуваше 3.703 евра.
Потоа следуваат Ирска, Австрија и Белгија со следниве бројки: 3.867, 3.811 и 3.401 евра во 2020 година, во споредба со 3.133, 3.632 и 3.401 евра во 2018 година. На седмото место на списокот е Финска со просечна бруто плата од 3.380 евра, која била иста и пред две години.
На осмото место е Шведска, каде има промена. Оваа година тие имаат просечна плата од 3.194 евра, а во 2018 година таа излесувала 3.340 евра.
Во Велика Британија просечната бруто плата годинава е 3.161 евра, за разлика од 2.498 евра во 2018 година. Веднаш потоа следува Франција, па Холандија. Франција годинава има плата од 3.097 евра (2.957 евра во 2018 година), а Холандија – 2.855 евра, што беше случај и пред две години.
Италија е на 12-то место со просечна бруто-плата од 2.442 евра во тековната година, односно 2.534 евра во 2018 година. Зад неа стои Шпанија со 2.279 евра од 2020 година и 2.189 евра во 2018 година. Потоа следува Кипар: 1.992 евра во 2020 година и 1.779 евра во 2018 година.
На 15-то место е Словенија, каде просечната бруто-плата е 1.855 евра, што е скок во споредба со 1.626 евра од 2018 година. Зад оваа земја стои Естонија со плата од 1.472, односно 1.221 евра во 2018 година. Португалија е на 17-то место, а во моментов нуди просечна плата од 1.418 евра, наспроти 1.158 евра во 2018 година.
Во последните две години, разликата во платата во Литванија е многу очигледна, така што оваа земја, од просечната плата од 2018 година, која изнесуваше 885 евра, достигна 1.381 евра. Малта е на 19-тото место, каде платата не е променета: таа изнесува 1.379 евра. Чешка е на 20-то место, со плата од 1.280 евра, пред две години, таа изнесуваше 1.149 евра.
Стигнуваме и до Хрватска, каде просечната бруто плата е 1.214 евра, а во 2018 година беше 1.081 евра. Под неа е Полска со 1.191 евра, или 1.102 евра во 2018 година. На 23-та позиција е Унгарија: денешната просечна бруто-плата е 1.154 евра, а пред две години беше 955 евра.
Летонија ги има овие бројки: 1.152 евра во споредба со 1.013 евра од 2018 година. Словачка е на 25-то место со 1.086 евра или 980 евра во 2018 година, по што следува Романија со просечна бруто плата од 1.075 евра, што е значителен скок во споредба со претходните две година, кога изнесуваше 787 евра.
Грција и Бугарија се на 27 и 28 место. Во Грција просечната бруто плата е 1.060 евра (1.092 евра беше во 2018 година), а во Бугарија таа е многу пониска и изнесува 690 евра, пред две години изнесуваше 586 евра.