Актерот Метју Пери, најпознат по улогата на Чендлер во серијата „Пријатели“, последните неколку месеци ја загрижи јавноста со својот изглед. Иако многумина претпоставуваа дека за запоставениот изглед на омилениот актер е виновен проблемот со зависностите, неговиот очув Кит Морисон откри дека Метју имал многу тешка операција на желудникот од која сè уште целосно не закрепнал. Во 2018 година, Пери поминал три месеци во болница.

– Во тоа време можевме да поминуваме многу време со него, што мислам дека беше добро за сите. Ужасно е кога луѓето сериозно ќе се разболат, кога мора да се оперираат и да се грижат дали ќе преживеат или не. Тоа сите нè поврза уште повеќе. Сите моравме да бидеме таму за да го извлечеме од тоа – рекол неговиот очув за магазинот „People“.

Тој исто така истакнал дека Метју сега се чувствува подобро и работи на нови проекти.

– Тој е многу талентиран и фокусиран лик. Многу е бистар. Таков беше уште како дете – нагласил Кит.

– Успехот на серијата „Пријатели“ го изненади Метју, како и сите нас. Воопшто не сум изненаден што токму тој е избран за таква улога. Улогата на Чендлер точно се поклопува со неговата посебна смисла за хумор. Дали тие го напишаа тоа знаејќи дека тој е како тој лик или тој тоа го прилагодил повеќе на себе, не знам. Веројатно е комбинација од двете. Тој е надарена душа и многу паметно и добро момче – заклучил неговиот очув.

Инаку, на почетокот на оваа година беше најавено повторна средба на Џенифер Анистон, Кортни Кокс, Лиза Кудроу, Мет Лебланк, Метју Пери и Дејвид Швимер, а фановите ширум светот со нетрпение очекуваат да ја погледнат специјалната епизода на „Пријатели“.

Снимањето е одложено неколкупати поради пандемијата на коронавирус.