Најголем број луѓе доживуваат срцев или мозочен удар околу 6:30 часот наутро, пишува „Дејли мејл“, а причината е нивоата на протеини во крвотокот.

Имено, научниците го анализирале протеинот плазминоген активатор инхибитор, кој го забавува метаболизмот на крвните згрутчувања. Тој е на врвот рано наутро, што го зголемува ризикот од мозочен и срцев удар.

– Ова е големо откритие за лекување пациенти со склоност кон кардиоваскуларни заболувања и настанување крвни згрутчувања, а може да послужи и за подобар тајминг на терапијата – рекол авторот на студијата д-р Френк Шир. Научниците планираат поопсежни студии на темата поврзаност помеѓу телесниот часовник и овој протеин.

Симптоми што може да најават инфаркт

Одредени симптоми на инфарктот може да се појават дури и еден месец пред срцевиот удар:

Замор

Ако дојде до стеснување на артериите, срцето добива помалку крв од вообичаената количина, што му ја отежнува работата. Ова е причината зошто секогаш се чувствувате изморени и сонливи.

Краток здив

Кога срцето прима помалку крв, тоа значи и дека белите дробови добиваат помалку кислород. Ако наеднаш имате проблеми со дишењето, секако треба да се консултирате со лекар, бидејќи можно е да се подготвува срцев удар.

Слабост

Ако чувствувате необјаснета слабост, можно е да дошло до стеснување на артериите, поради што крвта не циркулира како што треба. Тогаш ниту мускулите не добиваат сè што им е потребно и можно е да дојде до несвестица.

Ладна пот и вртоглавица

Лошата циркулација значи и дека протокот на крвта во мозокот е ограничен, што е опасно по живот. Во такви ситуации, чувствувате вртоглавица и збунетост и ова се симптоми што никако не треба да се игнорираат.

Притисок во градите

Раните симптоми на срцев удар вклучуваат немир и притисок во градите, помала болка или зголемен крвен притисок, а овие проблеми се јавуваат сè почесто како што се приближува денот на срцевиот удар.