Двајца обожаватели на Мадона велат дека нејзиниот концерт во Њујорк започнал со повеќе од два часа доцнење, поради што шоуто завршило во еден часот по полноќ, а тие следното утро морале да станат рано.

Мадона имаше три концерти во Њујорк во декември, а секој требал да започне во 20:30 часот, но првите тактови од нејзините песни се слушнале дури после 22:30 часот, поради што настапите на „кралицата на попот “ траеле до еден часот по полноќ, пишува „Би-би-си“.

Нејзините незадоволни обожаватели сега велат дека „немало да купат билети“ да знаеле дека концертот ќе заврши толку доцна.

Мајкл Фелоус и Џонатан Хејден тврдат во тужбата дека голем број луѓе кои присуствувале на концертот морале да „станат рано за работа и/или семејни обврски“ следниот ден.

Промоторот и Центарот Баркли добиле тужби за „лажно рекламирање, како и за нефер и измамнички трговски практики“.

Тие биле на концертот во среда на 13 декември 2023 година, но во судските документи стои дека настапите на 14 и 16 декември започнале и со повеќе од два часа доцнење.

Посетителите „не биле информирани дека концертите ќе започнат многу подоцна од времето напишано на билетот, па чекале со часови“, се наведува во судските документи.

Тие исто така додаваат дека Мадона „има долга историја да доцни на концерти, што понекогаш е и неколку часа“.