Љубителите на уметноста на 29 јуни ќе имаат можност да бидат дел од едно поинакво креативно доживување. Во 20 часот, во Бифе Тафталиџе во Скопје, ќе биде отворена првата неуро-арт изложба на уметницата Наде Молеровиќ, насловена „Обоени светови“.

Изложбата претставува визуелно патување низ светот на мислите, емоциите и потсвеста. Делата на Молеровиќ создаваат дијалог помеѓу хаосот и редот, а секоја линија и форма носат сопствена симболика, отворајќи простор за лична интерпретација и доживување.

„Нејзините цртежи служат како визуелен мост кој ги поврзува емоциите со надворешната реалност, создавајќи прослава на креативна енергија која се раѓа од центарот на битието. Нејзината линија е мапа на нејзината потсвест, каде што се пронаоѓа рамнотежата во хаосот“, стои во претставувањето на изложбата.

Покрај уметничката кариера, Наде Молеровиќ е професор, директор, мајка, сопруга и горда баба на Лука и Милена. Како страствен патувач, преку својот бренд „Револуција на свеста“ истражувала и творела инспирација во Калифорнија, Виетнам, Кипар, Дубаи, Москва, Ерусалим и Сиднеј.

Нејзината работа е насочена кон поттикнување на луѓето да размислуваат за моќта на добрината, убавите мисли, љубовта и толеранцијата. Таа покажува длабок интерес за функционирањето на мозокот, умот, мислите и емоциите, а нејзиното уметничко патување продолжува токму преку изложбата „Обоени светови“.

Во рамките на вечерта ќе има и поздравни обраќања од Татјана Алексиќ, Сузана Турунџиева, Тина Таутовиќ, Славица Новеска и Лавинија Шувака.

По официјалното отворање, посетителите ќе имаат можност да ги разгледаат изложените дела, да се дружат со авторката и да ја споделат креативната енергија што ја носи оваа необична уметничка приказна.

Настанот ќе се одржи на 29 јуни (понеделник), со почеток во 20 часот, во Бифе Тафталиџе во Скопје, а влезот е отворен за сите љубители на уметноста и креативниот израз.