Жителите на најстудените делови од планетата со векови го усовршувале начинот на преживување во сурови зимски услови. Нивните навики често им изгледаат чудни на оние што студот го доживуваат само сезонски, но токму во тие едноставни правила се крие тајната на топлината.

Зимата не бара повеќе облека, таа бара попаметен пристап. Ескимите тоа го знаат со генерации: топлината не е прашање на луксуз, туку на разбирање како функционира човечкото тело. Кога му дозволувате да „дише“, да циркулира и да го задржи воздухот каде што треба, дури и најстудените денови стануваат подносливи.

Проблемот, всушност, речиси никогаш не е самиот студ. Не е ни гардеробата. Проблемот е навиката што повеќето од нас несвесно ја повторуваат – навика која на ниски температури ја „исклучува“ циркулацијата во прстите. Луѓето што живеат таму каде што зимата не простува грешки знаат едно: ако телото не е правилно заштитено, прво ќе се откаже од рацете и стапалата. Затоа прстите ви трнат по само неколку минути, додека остатокот од телото сè уште изгледа релативно топло, пишува „Јутарњи лист“.

Грешката што речиси сите ја прават во зима

Кога ни е ладно, инстинктивно посегнуваме по еден дебел слој: дебели чорапи, масивни ракавици, тесни чизми. Но токму тоа често има спротивен ефект. Притисокот ја прекинува циркулацијата, воздухот нема простор да се задржи, а телото се лади уште побрзо.

Парадоксално, топлината не доаѓа од дебелината – туку од воздухот.

Затоа луѓето на север користат повеќеслојна облека која функционира како топлинска мрежа. Воздухот заробен меѓу тенките слоеви дејствува како природен изолатор.

Најефикасната комбинација вклучува: тенок термо-слој директно на кожата, среден слој што ја задржува топлината, надворешен слој што штити од ветер и влага.

Истото важи и за чорапите и ракавиците – два тенки слоја речиси секогаш греат подобро од еден дебел.

Ако стапалата или дланките ви се навлажнат, топлината исчезнува речиси веднаш. Влагата го лади телото побрзо отколку што очекуваме, особено кога ќе застанеме или ќе забавиме. Затоа е клучно да носите чорапи што впиваат пот, да ги менувате влажните слоеви штом почувствувате влага и да избегнувате материјали што ја задржуваат потта на кожата. Топла, но влажна чорапа е всушност најбрзиот пат до замрзнати стапала.

Зошто изолацијата треба да биде однадвор

Традиционалните ракавици од северните предели често имаат крзно или изолација поставена од надворешната страна. Причината е едноставна: влакната создаваат воздушен џеб кој ја задржува топлината, наместо да ја компресира. Денес истиот принцип се применува кај модерните ракавици и чизми со т.н. воздушни комори. Ако изолацијата е премногу збиена, таа всушност грее помалку.

На студ, телото инстинктивно ги штити виталните органи. Ако главата, вратот или грбот губат топлина, циркулацијата во рацете и стапалата автоматски се намалува. Затоа е важно да носите капа, да го заштитите вратот и грбот и да ги затворите сите места каде што навлегува ветер. Топлата глава многу често значи и топли прсти.

Дишењето преку шал помага повеќе отколку што мислите

Вдишувањето леден воздух преку уста или нос му создава стрес на организмот. Кога дишете преку шал или тенок слој ткаенина, воздухот се загрева пред да влезе во белите дробови, што ја стабилизира циркулацијата. Помал шок за телото значи повеќе топлина во екстремитетите.

Храната како внатрешен грејач

Во студени услови телото троши повеќе енергија, а храната богата со масти и протеини му помага да создава топлина одвнатре. Затоа оброк пред излегување на студ е задолжителен – празен стомак на температури под нулата значи побрзо смрзнување.

Корисни трикови

Лесно загрејте ги стапалата пред да излезете. Не ги стегајте чизмите – притисокот лади. Повремено мрдајте ги прстите додека стоите. Никогаш не излегувајте со мокра коса.