„Нема американски извидувачки балони над кинескиот воздушен простор, изјави денеска портпаролот на Белата куќа за национална безбедност Џон Кирби, откако американската војска во изминатите денови собори четири неидентификувани објекти, а за еден од нив тврди дека бил кинески шпионски балон.

Кирби со одговорот ги негираше тврдењата на Кина дека американски разузнавачки балони неовластено летале на голема височина над кинеска територија повеќе од десет пати од почетокот на 2022 година, пренесе „Ројтерс“.

По инцидентот со соборувањето на објектот за кој Вашингтон вели дека бил кинески шпионски балон, властите обвинија дека Кина на овој начин шпионирала во повеќе од 40 земји на пет континенти. Пекинг ги отфрли обвинувањата.