Неверојатна сличност: Уапсен Британец во Холандија, полицијата го помешала со шеф на мафија
Маж од Ливерпул бил грешно уапсен од страна на холандската полиција, кои биле убедени дека тој е шеф на мафијата.
Идентификуван само како Марк Л., 54-годишникот ја посети Холандија за да ја гледа Формула 1 трката, по што минатата среда полицијата го уапсила додека вечерал во ресторан. Тие му ги врзале очите и веднаш го пренеле во затвор.
Полицијата е убедена дека тој всушност е шеф на сицилијанската мафија, Матео Месини Денаро (59), кој се бара од 1993-та година поради бомбашки напад во кој загинаа 10 лица, а 93 беа повредени, пишува Дејли Меил.
Марк Л. на крајот беше ослободен четири дена подоцна, а полицијата ја призна грешката. Неговиот адвокат, Ван Клиф, за локалните вести изјави:
„Јас би паднал од столот ако тој навистина бил најбараниот италијански мафијаш“.
“Штом го кажа првиот збор, веднаш знаев дека е Британец кога го слушнав неговиот англиски акцент. Замислете дека во еден момент сте на вечера, а следниот ќе седите во холандски затвор со максимална заштита”. вели адвокатот.
Инаку, на Денаро во 2002-ра година му се судело во отсуство, а тој бил осуден на доживотен затвор во мај истата година за неговата улога во бомбашките напади во 1993-та година.