Американскиот актер и продуцент Патрик Малдун почина ненадејно на 19 април, по срцев удар, на 57-годишна возраст, пренесуваат американските медиуми.

Малдун беше познат по улогите во популарната серија „Денови од нашиот живот“ (Days of Our Lives), како и во „Мелроуз плејс“ (Melrose Place) и филмот „Ѕвездени војници“ (Starship Troopers).

Роден во Сан Педро, Калифорнија, дипломирал на Универзитетот во Јужна Калифорнија, каде што бил дел од фудбалскиот тим „Тројанс“. Актерската кариера ја започнал уште за време на студиите, со улоги во серии како „Кој е шефот?“ (Who’s the Boss?) и „Спасени од ѕвончето“ (Saved By the Bell).

Најголема популарност стекна со ликот Остин Рид во „Денови од нашиот живот“ (Days of Our Lives), кој го толкуваше од 1992 до 1995 година, а подоцна повторно се врати во серијата во периодот 2011–2012.

На филмското платно, Малдун ја толкуваше улогата на Зандер Баркалоу во „Ѕвездени војници“ (Starship Troopers) од 1997 година, во режија на Пол Верховен. Неговиот последен филм „Валкани раце“ (Dirty Hands) се очекува да излезе подоцна оваа година.

Покрај актерството, работеше и како извршен продуцент на повеќе филмови, меѓу кои „Племињата од Палос Вердес“ (The Tribes of Palos Verdes), „Арканзас“ (Arkansas), „Марлоу“ (Marlowe), „Бројачот на карти“ (The Card Counter), „Страшната“ (The Dreadful), „Риф Раф“ (Riff Raff), како и најновиот проект „Кокроч“ (Kockroach), кој моментално се снима.

Малдун беше страстен љубител на музиката и фронтмен на бендот „Слипинг Масес“ (The Sleeping Masses).

Блиските го опишуваат како харизматична и дарежлива личност, со препознатливо присуство, чувство за хумор и топлина што ги правела луѓето околу него да се чувствуваат прифатени.

Зад себе ги остави партнерката Миријам Ротбарт, неговите родители, сестрата и нејзиното семејство.