Српскиот актер Воја Брајовиќ (71), кој нашите гледачи го памтат како Тихи од „Отпишаните“, како што вели, немал негативен тест за ковид-19, кој е потребен за да се влезе во Хрватска од Србија, пишува „Курир.рс“.

– Требаше да снимам во Загреб минатата недела. Среде ноќ бев вратен од хрватската граница затоа што немав наод дека сум негативен на коронавирусот -рекол Брајовиќ.

Како што се наведува, на актерот му било кажано на границата дека во тој случај мора да помине 14 дена во изолација, а бидејќи имал други обврски, Брајовиќ тоа го одбил и се вратил во Белград истата ноќ. Брајовиќ, исто така, ги откажал сите дружења со пријателите во Загреб, што ги планирал за време на паузите на снимањето на филмот и се надева дека ситуацијата наскоро ќе биде подобра и дека нема да мора да се тестира за да оди во Хрватска.

– Колони луѓе стојат во редови за тестирање. Исто така, дискутабилно е дали наодите би биле готови навреме. Мислам дека ќе ги снимаме моите епизоди во септември и во октомври – рекол актерот.

Како што рекол Брајовиќ, во првиот бран на коронавирусот бил внимателен, затоа што припаѓа на ризичната група кога станува збор за ковид-19.