Претседателот на Соединетите Американски Држави, Доналд Трамп, потврди дека е постигнат конечен договор со Иран за завршување на војната и повторно отворање на стратешки важниот Ормуски Теснец. Во серија објави на неговата социјална мрежа Truth Social, Трамп прогласи дипломатска победа, опишувајќи го договорот како историски пробив што ќе донесе траен мир на Блискиот Исток и ќе ги стабилизира глобалните енергетски пазари.

– Овој одличен договор ќе донесе мир и безбедност во целиот регион – рече американскиот претседател.

Во таа прилика, тој се осврна на перформансите на своите претходници во Белата куќа, нагласувајќи дека успеал таму каде што другите не успеале.

– Многу претседатели се обидуваат да склучат мир со Иран и сите тие не успеаја пред мене. Лидерите на овој регион, за прв пат, најдоа претседател кој може да им помогне да постигнат вистински мир – додаде тој.

Договорот, чие постигнување претходно го најави пакистанскиот премиер Шехбаз Шариф, предвидува итно прекинување на сите воени операции. Трамп нагласи дека договорот носи клучна промена во начинот на навигација низ теснецот, кој со месеци беше контролиран од Техеран и блокиран од американската морнарица.

– Договорот со Исламската Република Иран сега е завршен. Честитки до сите! Со ова целосно го одобрувам отворањето на Ормускиот Теснец без патарина и, истовремено, наредувам итно укинување на поморската блокада на Соединетите Американски Држави – напиша Трамп.

Во својот препознатлив стил, тој испрати порака до глобалните бродски компании чии танкери се заробени во Персискиот Залив со месеци:

– Бродови од светот, стартувајте ги вашите мотори. Пуштете ја нафтата да тече! – напиша тој.

Официјалното потпишување на меморандумот за разбирање е закажано за петок, 19 јуни во Швајцарија, по што веднаш ќе започне техничката имплементација на терен. Според Трамп, првата фаза ќе вклучува итни безбедносни мерки за обезбедување на водниот пат за комерцијален сообраќај.