Претседателката Гордана Сиљановска-Давкова им оддаде почит на претседателот Борис Трајковски и на членовите на македонската делегација кои загинаа во авионска несреќа во БиХ пред точно 22 години.

„Претседателот Трајковски ќе остане запаметен како државник, лидер и добар човек, чиј живот и политика се темелеа на принципи и вредности. Беше заколнат миротворец, борец за човекови права, длабоко веруваше во македонската европска иднина и демократијата. Неговата визија останува наша обврска! Во знак на сеќавање и благодарност се поклонив пред вечните почивалишта на загинатите членови на делегацијата: Димка Илкова – Бошковиќ, Ристо Блажевски, Миле Крстевски, Марко Марковски и Бранко Ивановски на гробиштата „Бутел“ во Скопје“ напиша Сиљановска на Фејсбук.

Таа додаде дека делегации им оддадоа почит и на Анита Кришан Лозановска на гробиштата во Велес, на Борис Велинов на гробиштата во населба Илинден и на Аце Божиновски на гробиштата во Бардовци.