Претседателот на Белорусија, Александар Лукашенко, денеска се појави во јавноста за првпат по неколку недели и ги коментираше инсинуациите што се шират на социјалните мрежи за неговата болест, велејќи дека „нема никаква намера да умре“, пренесе „Ројтерс“.

„На сите им дадов инструкции (на денешниот состанок за развој на здравствениот систем во државата). Не дај Боже да не се прави сѐ. Вклучете се и почнете да работите. Во спротивно, нема да имам милост за никого. И ако некој мисли дека ќе умрам, не плашете се. Не плашете се. Тоа се обични дискусии со празни глави на месинџери и канали на ‘Телеграм’. Тоа беше аденовирус, ништо друго“, изјавил Лукашенко, според државната новинска агенција „Белта“.

Гласините за влошено здравје на Лукашенко се појавија откако се појави на воената парада во Москва на 9 мај, бледо и благо нестабилен.

Во денешната изјава, Лукашенко додава дека инфекцијата која ја имал „се лекува три дена“.