Поранешниот градоначалник на Карпош, Стевчо Јакимовски, преку објава на социјалните мрежи предупредува дека објект во кој е најавена голема забава вечерва не е безбеден и дека лани, додека на чело на општината беше тој, била изречена забрана за користење на покривот на објектот.

Тогаш, вели Јакимовски, општината наложила и да се срушат скалите кои водат кон просторот на покривот.

„Денес истиот тој кров е распродаден за журка. Кој дозволил? Кој презел одговорност? Кој ќе одговара ако се случи несреќа?“, прашува Јакимовски во видео кое го објави на социјалните мрежи.

Тој ја спомена и трагедијата во дискотеката „Пулс“ во Кочани и рече дека по неа сите ветувале дека ќе извлечат поуки, но според него, „некои ги заборавиле лекциите и повторно дозволуваат ризични ситуации“.

„Животот на луѓето не смее да биде помалку важен од профитот“, вели Јакимовски повикувајќи на поголема одговорност и почитување на безбедносните стандарди.

Тој обвини и дека сопствениците на објектот во кој се одржува настанот се „блиски до владејачката партија ВМРО-ДПМНЕ“ алудирајќи дека одржувањето на забавата се дозволува поради таа наводна блискост.