Во општината Минхендорф во Австрија е откриено распаднато тело на 99-годишна жена, заѕидано во нејзината куќа. Жената, која за неколку недели требало да го прослави 100. роденден, таму најверојатно лежела со години, а можно е и цела деценија. Случајот сега го истражува полицискиот оддел за убиства, поради сомнеж за измама со социјални надоместоци, пишува австриски „Кроне“.

Страшното откритие на 28 мај ја потресе општината со околу 3.000 жители во предградие на Виена. Жителите се шокирани, а низ местото кружат бројни гласини.

Еден сосед раскажал дека ја познавал жената, која во Минхендорф имала втора куќа, но дека долго време не ја виделе. Повремено се појавувал нејзиниот син за да изврши работи околу куќата, но во општината никој не го познавал подобро.

Истражителите го бараат синот

Случајот бил отворен откако роднини го пријавиле исчезнувањето на жената. Пожарникари влегле насилно во куќата, а полициските кучиња трагачи веднаш намирисале трага. Потоа, истражителите во ѕидот на спустот кон подрумот го пронашле распаднатото тело на исчезнатата жена.

Жената, според медиумите, наводно во раката држела бројаница. Обдукцијата не покажала знаци на насилна смрт, но истражителите од Одделот за убиства на Покраинската криминалистичка служба на Долна Австрија сакаат итно да разговараат со синот на починатата.

Тој, наводно, подолго време се наоѓа во странство, а се очекува по враќањето, како клучен сведок, да помогне во расветлувањето на овој мистериозен случај.

Измама со пензија?

„Сите сме длабоко потресени. По гостилниците се зборува сè и сешто. Јас тогаш секогаш прашувам: а од каде го знаете тоа“, рекол Марио, вработен во една селска гостилница.

Според информациите на австриските медиуми, засега нема индиции дека станува збор за кривично дело убиство. Интензивно се истражува зошто жената била заѕидана и кој е одговорен за тоа. Во моментов, многу работи упатуваат на можна измама со социјални надоместоци и нарушување на мирот на починатата, бидејќи нејзината пензија и понатаму редовно била исплаќана.

Овој случај потсетува на настан од пред неколку дена во Салцбург, каде што во напуштена гостилница исто така беа пронајдени две распаднати тела. Пред повеќе од две години, во истата зграда, која бездомници често ја користеле како преноќиште, избувнал пожар во кој неколку лица биле повредени.

Австриецот кој го планирал нападот на концертот на Тејлор Свифт во Виена е осуден на 15 години затвор