Премиерот Димитар Ковачевски одговори дека јавноста не може да знае се’ и не може да се споделуваат јавно информации од безбедносно – разузваначки карактер,  прашан дали е запознаен со изјавата на бугарскиот министер Асен Василев дека колегите разузнавачи од Северна Македонија им дале информации дека руски свештеник врбувал македонски државјани.

-Не сум ја видел изјавата на бугарскиот министер, меѓутоа сите тие информации за кои што прашувате се дел од информации кои се на располагање на разузнавачки и безбедносни служби кои што не можат да се споделуваат на прес-конференции, рече премиерот Ковачевски прашан дали има инфомрмација кои се тие лица кои биле врбувани и дали се свештеници.

На дополнителното прашање како го толкува фактот што се уште Синодот на МПЦ-ОА не се произнел за ваквите тврдења, премиерот повтори дека  не можат сите информации да и се дадат на тацна на целата јавност.

-Јас ви кажав дека информации во однос на одлуки кои што се однесуваат на безбедноста во државата, согласно сите закони, вклучително и Законот за странци не можат да се коментираат на прес-конференции, туку тие се дел од информации и постапки кои се дел од работата на безбедносните разузнавачки и контраразузнавачки служби, рече Ковачевски на новинарско прашање.

Бугарскиот министер за финансии и копретседател на партијата Продолжуваме со промената, Асен Василев неодамна за бугарски медиуми изјави дека колегите од Северна Македонија им дале информации дека руски свештеник врбувал македонски државјани.