Поранешниот селектор на Србија и фудбалер на Црвена звезда, Драган Стојковиќ – Пикси, наводно доживеал непријатна ситуација за време на посетата на стадионот „Рајко Митиќ“, објавуваат српските медиуми.

Според информациите на „Спорт Клуб“, инцидентот се случил пред неколку дена во кафуле кое е во сопственост на легендарниот голман на Црвена звезда, Стеван Стојановиќ – Дика. Пикси дошол да го посети својот долгогодишен пријател и седнал во локалот, но набрзо таму пристигнала група навивачи на белградскиот клуб.

Наводно, тие побарале од Стојковиќ да го напушти објектот и просторот околу стадионот. Иако Стојановиќ се обидел да ја смири ситуацијата и да спречи поголем инцидент, навивачите останале на својот став.

Според истите извори, тие му се извиниле на Дика, но не отстапиле од барањето Пикси да си замине. Поранешниот фудбалер и тренер, без дополнителни реакции, мирно го напуштил кафулето.

Српските медиуми потсетуваат дека ова не е првпат Стојковиќ да се соочи со ваква непријатност, бидејќи сличен инцидент му се случил и во 2012 година.