Жестока реакција пристигна од таборот на Шкендија по одлуката на дисциплинските органи на Фудбалската федерација на Македонија да изречат висока парична казна на тетовскиот клуб по инцидентите во финалето на Купот на Македонија.

Клубот е санкциониран со вкупно 105.000 евра поради повеќе прекршоци регистрирани на натпреварот, меѓу кои употреба на пиротехника од страна на навивачите, националистички скандирања, истакнување спорен транспарент со нацистичка содржина, непочитување на државната химна и напуштање на церемонијата за доделување на медалите. Дополнително, поради последниот прекршок, Шкендија нема да настапува во Купот на Македонија следната сезона.

Незадоволството од казната кулминираше со остро соопштение од раководството и генералниот спонзор на клубот, кои побараа ФФМ итно да ја преиспита и коригира одлуката.

Во реакцијата се истакнува дека Шкендија со години функционира како еден од најорганизираните и финансиски најстабилни клубови во земјата, исполнувајќи ги своите обврски и вложувајќи значителни средства во развојот на фудбалот. Од клубот потсетуваат и на успесите во европските натпреварувања, нагласувајќи дека токму нивните резултати придонеле за подобрување на рејтингот на македонскиот фудбал на меѓународната сцена.

Спонзорот предупреди дека ваквите одлуки сериозно го доведуваат во прашање понатамошниот ангажман во македонскиот фудбал и најави можност за повлекување доколку казната остане на сила.

„Очекуваме надлежните органи на ФФМ повторно да ја разгледаат оваа одлука во интерес на спортската правда, клубот и иднината на македонскиот фудбал“, порачуваат од Шкендија.