Менаџерот на Ливерпул, Јирген Клоп најверојатно за утрешниот натпревар нема да може да смета на голманот кој дојде во тимот пред една недела, Адријан.

Адријан пристигна на „Енфилд“ како замена за повредениот Алисон и беше најзаслужен за победата на неговиот тим во Европскиот Супер куп откако во пенал серијата против Челси, го одбрани шутот на Абрахам, но на прославата се повреди.

Според весникот „Тајмс“, 32-годишниот шпански голман се повреди за време на прославата на трофејот на стадионот на Бешикташ во Истанбул, а главен виновник за повредата е навивач токму на Ливерпул.

– Не разбирам зашто во светот на универзална социјализација, кога сите сме заедно, навивач толку лесно ја прескокна оградата, и со лизгачки старт го удри Адријан во зглобот кој сега е потечен и ни направи проблем за натпреварот со Саутемптон – изјави Клоп.

Во отсуство на Алисон и Адријан, на голот на Ливерпул во натпреварот од второто коло во Премиерлигата најверојатно ќе се најде 35-годишниот Енди Лонерган.