Изминатиот месец не само што бил најтоплиот септември откако се мери температурата, туку бил и за половина Целзиусов степен потопол од досегашниот рекорд.
Септември е третиот месец во низа што ги соборил историските рекорди, што ги потврдува проекциите дека оваа година е најжешката уште од времето на Леденото доба.

Просечната глобална температура во изминатиот септември била за 1,8 степен повисока отколку во соодветните месеци пред Индустриската револуција – референтниот период по кој човештвото засилено испушта гасови што ја загадуваат атмосферата и го предизвикуваат ефектот на стакленичка бавча.

Графиконите покажуваат стабилно зголемување на просечните температури од година в година, но климатолозите веќе со месеци наназад предупредуваат дека идната година ќе биде екстремно жешка и ќе отстапува од просекот, како последица од феноменот Ел нињо – загревање на површината на океаните, кое веќе почна и ќе кулминира во следните неколку месеци. Дури во 2025 година може да се очекува релативно „заладување“ на планетата, но само во споредба со претходните неколку години.

– Септември беше, според моето професионално мислење како климатски научник, апсолутно споулавен, за преку 0,5 степени пожежок од претходниот и за околу 1,8 степен потопол од прединдустриското ниво – забележа Зеки Хаусфадер од Климатскиот проект на универзитетот Беркли.

Професорот Ед Хокинс од Универзитетот во Ридинг го опишува целото лето како „ненормално“, а Мика Рантанен од Финскиот метеоролошки институт вели: „Сѐ уште се мачам да сфатам како е можно толку многу температурата да се зголеми во споредба со претходните години“.

– Температурите без преседан во ова време од годината ги пробија сите рекорди за неверојатно многу. Оваа година е на пат да биде најтоплата, со просечна темпратура за 1,4 степен повисока од прединдустриското ниво – изјави Саманта Бургес од сервисот за климатски промени „Коперникус“ на Европската Унија.

Ситуацијата е страшна и на јужната хемисфера. Австралиската експертска за клима Џоел Гергис предупредува: „Показателите за австралиската клима во септември се шокантни. Максималните температури се највисоки откако се следат, во некои региони дури 3 до 5 степени над просечните. Слабите врнежи укажуваат на суша. Летото ќе биде брутално“.