Официјален претставник на НАТО денеска изјави дека рускиот заговор за атентат на шефот на германската индустрија за оружје, Рајнметал, е меѓу актите на саботажа извршени во земјите-членки на воената алијанса во последните години.

Говорејќи пред Европскиот парламент, заменик-помошникот генерален секретар на НАТО за иновации, хибриден сектор и сајбер простор, Џејмс Апатураи, го потврди планот против извршниот директор на Рајнметал, Армин Папергер.

Официјалниот претставник на НАТО рече дека инцидентите на саботажа вклучуваат „излетување на воз од шините, акти на подметнување пожари, напади на имотот на политичарите, закани за заговор за убиство на раководители на индустријата, како што е заканата објавена во јавноста против шефот на Рајнметал. Но, имаше и други заговори“.

Заговорот беше осуетен од разузнавачките служби на Соединетите Американски Држави и Германија , а ова е првпат висок функционер на НАТО, Германија или САД официјално да потврди дека имало заговор за атентат врз Папергер, за што на големо пишуваа светските медиуми во јули 2024 година.